బట్టతల కాదు… మళ్లీ జుట్టు మొలకెత్తే ఆశ

తీవ్రమైన అలోపేషియా అరియాటాలో జుట్టు తిరిగి పెంచిన కొత్త ఔషధం

జుట్టు ఊడిపోవడం చాలామందికి కేవలం అందానికి సంబంధించిన సమస్యగా కనిపించవచ్చు. కానీ కొంతమందిలో జుట్టు అకస్మాత్తుగా పెద్ద మొత్తంలో రాలిపోవడం, కనుబొమ్మలు, కనురెప్పల వెంట్రుకలు కూడా పోవడం జరుగుతుంది. దీనిని అలోపేషియా అరియాటా అంటారు. ఇది సాధారణ జుట్టు రాలడం కాదు—శరీరంలోని రోగనిరోధక వ్యవస్థ పొరపాటున వెంట్రుకల కుదుళ్లపై దాడి చేసే ఒక ఆటో ఇమ్యూన్ వ్యాధి. ఇలాంటి తీవ్రమైన అలోపేషియా అరియాటాతో బాధపడుతున్న వారికి కొత్త ఆశాకిరణంగా ఉపాడాసిటినిబ్అనే ఔషధం నిలుస్తోంది. ఇది ఇప్పటికే రుమటాయిడ్ ఆర్థరైటిస్ వంటి కొన్ని ఇన్‌ఫ్లమేటరీ వ్యాధుల చికిత్సలో ఉపయోగిస్తున్న మందు. రిన్ వోక్ అనే బ్రాండ్ పేరుతో ఇది అందుబాటులో ఉంది.

1,399 మందిపై కీలకమైన అధ్యయనం ఉపాడాసిటినిబ్ ప్రభావాన్ని తెలుసుకోవడానికి రెండు పెద్ద ఫేజ్-3 క్లినికల్ ట్రయల్స్ నిర్వహించారు. ఇందులో తీవ్రమైన అలోపేషియా అరియాటాతో బాధపడుతున్న 1,399 మంది పెద్దలు, కిశోరులు పాల్గొన్నారు. వీరికి కనీసం సగం తల వెంట్రుకలు కోల్పోయి ఉన్నాయి. అధ్యయనంలో రోజుకు 30 మి.గ్రా. మోతాదు తీసుకున్న వారిలో 24 వారాల తరువాత సుమారు 54–55 శాతం మందికి తలపై కనీసం 80 శాతం జుట్టు తిరిగి పెరిగింది. మరింత ఆశ్చర్యకరమైన విషయం ఏమిటంటే, సుమారు 20–23 శాతం మందిలో తలపై జుట్టు పూర్తిగా లేదా దాదాపు పూర్తిగా తిరిగి పెరిగింది.

కనుబొమ్మలు, కనురెప్పలకూ ప్రయోజనం

ఈ ఔషధ ప్రభావం కేవలం తల వెంట్రుకలకే పరిమితం కాలేదు. కనుబొమ్మలు, కనురెప్పల వెంట్రుకల పెరుగుదలలో కూడా గణనీయమైన మెరుగుదల కనిపించింది. కొంతమంది రోగుల్లో ఈ మార్పులు చికిత్స ప్రారంభించిన ఎనిమిది వారాలకే కనిపించడం ప్రారంభమైంది.

అసలు అలోపేషియా అరియాటా ఎందుకు వస్తుంది?

మన శరీర రోగనిరోధక వ్యవస్థ సాధారణంగా వైరస్‌లు, బ్యాక్టీరియా వంటి శత్రువుల నుంచి మనలను రక్షిస్తుంది. అయితే అలోపేషియా అరియాటాలో ఈ వ్యవస్థ పొరపాటున వెంట్రుకల కుదుళ్లను శత్రువులుగా భావించి వాటిపై దాడి చేస్తుంది. దీంతో జుట్టు పెరుగుదల ఆగిపోవచ్చు. కొంతమందిలో చిన్న చిన్న గుండ్రటి మచ్చల రూపంలో జుట్టు రాలిపోతే, మరికొందరిలో తల వెంట్రుకలు పూర్తిగా పోవచ్చు. తీవ్రమైన సందర్భాల్లో కనుబొమ్మలు, కనురెప్పలు, శరీరంలోని ఇతర వెంట్రుకలు కూడా రాలిపోవచ్చు.

ఉపాడాసిటినిబ్ ఎలా పనిచేస్తుంది?

ఉపాడాసిటినిబ్ ఒక జాక్ ఇన్ హెబిటర్. శరీరంలో వాపు, రోగనిరోధక ప్రతిస్పందనను నియంత్రించే జాక్ స్టాట్ అనే సంకేత మార్గంలో జాక్ అనే ఎంజైములు ముఖ్యమైన పాత్ర పోషిస్తాయి. ఉపాడాసిటినిబ్ ఈ జాక్ సంకేతాలను అడ్డుకోవడం ద్వారా అధికంగా పనిచేస్తున్న రోగనిరోధక ప్రతిస్పందనను తగ్గిస్తుంది. ఫలితంగా కొంతమంది అలోపేషియా అరియాటా రోగుల్లో వెంట్రుకల కుదుళ్లపై జరుగుతున్న దాడి తగ్గి, మళ్లీ జుట్టు పెరిగే అవకాశం ఏర్పడుతుంది.

అందరికీ 100 శాతం పనిచేస్తుందా?

కాదు. ఇదే ఈ వార్తలో అత్యంత ముఖ్యమైన విషయం. క్లినికల్ ట్రయల్స్‌లో మంచి ఫలితాలు కనిపించినప్పటికీ, ప్రతి రోగిలో జుట్టు పూర్తిగా తిరిగి పెరుగుతుందని చెప్పలేం. వ్యాధి తీవ్రత, వ్యాధి వ్యవధి, వ్యక్తిగత రోగనిరోధక ప్రతిస్పందన వంటి అనేక అంశాలు ఫలితాలను ప్రభావితం చేయవచ్చు. అంతేకాదు, ఉపాడాసిటినిబ్ సాధారణంగా స్వయంగా తీసుకునే మందు కాదు. ఇది శక్తివంతమైన ప్రిస్క్రిప్షన్ ఔషధం. ఇన్ఫెక్షన్లు, రక్తంలో కొన్ని మార్పులు, ఇతర తీవ్రమైన దుష్ప్రభావాలకు సంబంధించిన ప్రమాదాలు ఉన్నందున వైద్యుల పర్యవేక్షణ అవసరం. అధ్యయనాల్లో కొత్తగా గుర్తించబడిన భద్రతా సమస్యలు కనిపించకపోయినా, ఈ మందుకు ఇప్పటికే తెలిసిన భద్రతా జాగ్రత్తలను తప్పనిసరిగా పరిగణనలోకి తీసుకోవాలి.

యూరప్‌లో కీలకమైన అడుగు

తీవ్రమైన అలోపేషియా అరియాటా చికిత్స కోసం రిన్ వోక్ కు 2026 జూలై 29న యూరోపియన్ కమిషన్ అనుమతి ఇచ్చింది. ఇది 12 సంవత్సరాలు మరియు అంతకంటే ఎక్కువ వయస్సున్న కిశోరులు, పెద్దలకు వర్తిస్తుంది. అమెరికాలో మాత్రం అలోపేషియా అరియాటా కోసం దీని వినియోగంపై యుఎస్ ఎఫ్ డిఎ నిర్ణయం ఇంకా సమీక్షలో ఉంది.

చివరగా…

జుట్టు రాలడం ఒక వ్యక్తి ఆత్మవిశ్వాసాన్ని, సామాజిక జీవితాన్ని, మానసిక ఆరోగ్యాన్ని కూడా ప్రభావితం చేయగలదు. ముఖ్యంగా తీవ్రమైన అలోపేషియా అరియాటాతో బాధపడేవారికి జుట్టు తిరిగి పెరగడం ఒక వైద్యపరమైన మార్పు మాత్రమే కాదు—జీవితంపై నమ్మకాన్ని తిరిగి పొందే అవకాశం కూడా. ఉపాడాసిటినిబ్‌పై వచ్చిన ఈ ఫలితాలు అలోపేషియా అరియాటా చికిత్సలో ఒక ముఖ్యమైన ముందడుగు. అయితే దీనిని “జుట్టు పెంచే సాధారణ మాత్ర”గా భావించడం మాత్రం తప్పు. సరైన రోగికి, సరైన మోతాదులో, నిపుణుల పర్యవేక్షణలో మాత్రమే ఉపయోగించాల్సిన ఔషధం ఇది. శాస్త్రం ముందుకు సాగుతున్న కొద్దీ… జుట్టు కోల్పోయిన వారికి కూడా కొత్త ఆశలు మొలకెత్తుతున్నాయి.

డాక్టర్ చింతా ప్రభాకర్ రెడ్డి ఎంఎస్ ఎంసిహెచ్

గుండె, ఊపిరితిత్తుల శస్త్రచికిత్స నిపుణులు

ప్రభుత్వ సర్వజన వైద్యశాల కర్నూలు