మేకల రక్తంతో మనుషుల ప్రాణాలు తీస్తున్నారా?

ఇదే నిజమైతే మనమంతా మన విలువలను మరోసారి పరీక్ష చేసుకోవాలి. మేకల రక్తంనుంచి ప్లేట్ లెట్ ల తయారీ. అక్రమ సంపాదనకు బానిసైన రక్త మాఫియా ఈ రకమైన వ్యాపారాన్ని ఎంచుకుంది. వారు మేక, గొర్రెల రక్తం నుండి ప్లేట్‌లెట్‌లను తీసి మనుషులకు ఎక్కించి జీవితాలతో ఆడుకుంటున్నారు. మేడ్చల్ మల్కాజిగిరి జిల్లా నాగారంలో ఇటీవల జరిగిన సంఘటన వైద్య రంగాన్ని దిగ్భ్రాంతికి గురిచేసింది.

ఈ నెల 4న కీసర పోలీసులు నాగారంలోని ఒక చికెన్ దుకాణంపై దాడి చేసి 130 ప్యాకెట్ల మేక రక్తాన్ని కనుగొన్నారు. ఈ రక్తాన్ని కాచిగూడలోని సిఎస్‌కె ఇంపోర్ట్స్ అండ్ ఎక్స్‌పోర్ట్స్‌కు రవాణా చేసి, అక్కడి నుండి ప్రయోగశాలలలో ప్లేట్‌లెట్ ఉత్పత్తికి ఉపయోగిస్తున్నట్లు ప్రాథమిక దర్యాప్తులో తేలింది. ఈ 'మేక రక్త మాఫియా' ఎటువంటి వైద్య ప్రమాణాలు లేకుండా మేకలు, గొర్రెల నుండి అక్రమంగా రక్తాన్ని సేకరించి ప్లేట్‌లెట్ ఉత్పత్తికి రవాణా చేయడం ద్వారా తీవ్ర ఆందోళన కలిగిస్తోంది. అనారోగ్యం కారణంగా ప్లేట్‌లెట్లు అవసరమైనప్పుడు మానవ రక్తమా లేదా మేక రక్తమా అని ఆలోచించాల్సిన పరిస్థితి ఏర్పడింది.

ఇది ఎక్కిస్తే ప్రాణాంతక ప్రతిచర్యలు:

డెంగ్యూ, క్యాన్సర్ శస్త్రచికిత్సల సమయంలో తీవ్రమైన రక్తస్రావాన్ని నియంత్రించడంలో ప్లేట్‌లెట్లు కీలక పాత్ర పోషిస్తాయి. కఠినమైన బయోసేఫ్టీ ప్రమాణాలతో ప్రభుత్వం ఆమోదించిన రక్త బ్యాంకులు, ల్యాబ్‌లలో మాత్రమే వీటిని ఉత్పత్తి చేస్తారు. మేకలు, గొర్రెలు వంటి జంతువుల రక్తాన్ని ప్లేట్‌లెట్ ఉత్పత్తిలో ఉపయోగించరు. జంతువుల రక్తంలోని ప్రోటీన్లు మనుషులకు సరిపోవు.

సమగ్ర దర్యాప్తు అవసరం:

గతంలో ఈ అక్రమ రక్తం ఎక్కడికి పోయిందో, ఎన్ని ల్యాబ్‌లు, ఆసుపత్రులు దీనిని ఉపయోగించాయో సమగ్ర దర్యాప్తు చేయాలని వైద్య, ప్రజారోగ్య నిపుణులు డిమాండ్ చేస్తున్నారు. జిల్లా వైద్య అధికారులు, డ్రగ్స్ కంట్రోల్, మెడికల్ కౌన్సిల్, వెటర్నరీ డిపార్ట్‌మెంట్, జిహెచ్ఎంసి పోలీసులు రాష్ట్ర వ్యాప్తంగా కలిసి పనిచేయాలి.

లాభాలే లక్ష్యం:

త్వరగా డబ్బు సంపాదించాలనే లక్ష్యంతో, మాఫియా మేకలు, గొర్రెలు మొదలైన జంతువుల నుండి రక్తాన్ని సేకరించి ప్రయోగశాలలకు రవాణా చేస్తోంది. అక్కడ, ఎటువంటి ప్రమాణాలు లేకుండా, వారు ప్లేట్‌లెట్లను ఉత్పత్తి చేసి ఆసుపత్రులకు సరఫరా చేస్తున్నారు. దీనిపై పోలీసులు దర్యాప్తు చేస్తున్నారు. మనకు ఇంకా నిజాలు తెలియాల్సి ఉంది.

డాక్టర్ చింతా ప్రభాకర్ రెడ్డి ఎంఎస్ ఎంసిహెచ్

గుండె, ఊపిరితిత్తుల శస్త్రచికిత్స నిపుణులు

ప్రభుత్వ సర్వజన వైద్యశాల కర్నూలు