భారత్–పాక్కి చెందిన ఈ ఇద్దరు అమ్మాయిల స్నేహం ఎందుకు వైరల్ అవుతోంది?
9 ఏళ్లుగా కొనసాగుతున్న స్నేహం.. ఢిల్లీ అమ్మాయి, కరాచీ బెస్ట్ఫ్రెండ్ కథ వైరల్
ఢిల్లీ: దేశాలు వేరు.. సంస్కృతులు వేరు.. కానీ స్నేహానికి మాత్రం సరిహద్దులు లేవు. ఢిల్లీకి చెందిన అనుష్ణ, కరాచీకి చెందిన అరీబా స్నేహకథ ఇప్పుడు సోషల్ మీడియాలో అందరి దృష్టినీ ఆకర్షిస్తోంది. తొమ్మిదేళ్ల క్రితం లండన్లో మొదలైన వీరి పరిచయం.. నేటికీ అదే ఆప్యాయతతో కొనసాగుతోంది. 2017లో ఇద్దరూ లండన్ స్కూల్ ఆఫ్ ఎకనామిక్స్ లో చదువుకునేందుకు వెళ్లారు. ఒకే రోజు యూనివర్సిటీకి చేరుకున్నప్పటికీ, అప్పటివరకు ఒకరికొకరు తెలియదు. కొత్త నగరం.. కొత్త వాతావరణం.. కుటుంబాలకు దూరంగా ఉన్న ఆ సమయంలో ఇద్దరూ యూనివర్సిటీ రిసెప్షన్ ప్రాంతంలో కూర్చున్నారు. అప్పుడే అనుష్ణ అరీబాను చూసి “నీకు నీళ్లు కావాలా?” అని అడిగింది. చాలా చిన్న ప్రశ్న. కానీ అదే వారి తొమ్మిదేళ్ల స్నేహానికి మొదటి అడుగు.
ఆ తర్వాత లిఫ్ట్లో మరోసారి ఎదురుపడిన ఇద్దరూ మాట్లాడుకోవడం ప్రారంభించారు. కొద్దికాలానికే మంచి స్నేహితులుగా మారిపోయారు. ఎలాంటి ముందస్తు ప్లాన్ లేకుండా ఉదయాన్నే బయటకు వెళ్లి లండన్ వీధుల్లో తిరగడం, గంటల తరబడి మాట్లాడుకోవడం వారి రోజువారీ జీవితంలో భాగమైంది. కొన్నిసార్లు మాటలు లేకపోయినా కలిసి ఉండటం తమకు ఎంతో సహజంగా అనిపించేదని అరీబా గుర్తుచేసుకుంది. కాలేజీ రోజుల్లో అరీబా ఎదుర్కొన్న వ్యక్తిగత సమస్యలను అనుష్ణతో పంచుకునేది. చదువు ఒత్తిడి, ఇతరులతో తనను తాను పోల్చుకోవడం వంటి విషయాల్లో అనుష్ణ తనకు ధైర్యం ఇచ్చేదని అరీబా తెలిపింది. ఒకసారి రూమ్మేట్తో ఎదురైన సమస్య కారణంగా అరీబా వేరే గదికి మారినప్పుడు.. ఆ విషయాన్ని మొదట అనుష్ణకే చెప్పింది. ఆ తర్వాత ఇద్దరూ క్యాంపస్ సమీపంలోని స్టార్బక్స్కు వెళ్లి ఒక పేస్ట్రీ పంచుకున్నారు. ఆ చిన్న సంఘటనే వారి స్నేహంలో ఒక మధురమైన జ్ఞాపకంగా మిగిలిపోయింది. చదువు పూర్తయ్యాక అనుష్ణ ఢిల్లీకి తిరిగి వెళ్లగా.. అరీబా కరాచీలోనే ఉండిపోయింది. రెండు దేశాలు.. వేల కిలోమీటర్ల దూరం.. అయినా వారి స్నేహం మాత్రం కొనసాగింది. వారానికి ఒకసారి వీడియో కాల్లో మాట్లాడుకుంటూ ఉద్యోగాలు, వ్యక్తిగత విషయాలు, జీవితంలో ఎదురయ్యే సవాళ్లను ఒకరితో ఒకరు పంచుకునేవారు. భారత్–పాకిస్థాన్ క్రికెట్ మ్యాచ్ల సమయంలోనూ వారి స్నేహం ఆసక్తికరంగా మారేది. పాకిస్థాన్కు చెందిన అరీబా.. తన బెస్ట్ఫ్రెండ్ అనుష్ణ భారతీయురాలు కావడంతో భారత్ గెలిచినా తనకు సంతోషమేనని చెప్పినట్లు కథనాల్లో పేర్కొన్నారు.
తొమ్మిదేళ్ల తర్వాత.. అదే పేస్ట్రీ!
వారి స్నేహకథలో అత్యంత అందమైన క్షణం తొమ్మిదేళ్ల తర్వాత వచ్చింది. ఇటీవల అనుష్ణ తన తల్లితో కలిసి లండన్ వెళ్లినప్పుడు.. ఇద్దరూ తమ పాత క్యాంపస్ సమీపంలోని కేఫ్కు మరోసారి వెళ్లారు. అక్కడ తొమ్మిదేళ్ల క్రితం మాదిరిగానే ఒక పేస్ట్రీ ఆర్డర్ చేసి కలిసి పంచుకున్నారు. అయితే ఈసారి ఆ జ్ఞాపకంలో మరో ప్రత్యేకత ఉంది. అనుష్ణ తల్లి కూడా వారితో కలిసి ఆ పేస్ట్రీని పంచుకున్నారు.
“నీళ్లు కావాలా?” నుంచి.. జీవితాంతం స్నేహం వరకు!
2017లో ఒక అపరిచితురాలిని ఉద్దేశించి అడిగిన “నీకు నీళ్లు కావాలా?” అనే చిన్న ప్రశ్న.. తొమ్మిదేళ్ల తర్వాత ఒక అందమైన స్నేహకథగా మారింది. ఢిల్లీ నుంచి కరాచీ వరకు దూరం ఉన్నా.. వారి అనుబంధం మాత్రం కొనసాగుతూనే ఉంది. సరిహద్దులు దేశాలను వేరు చేయగలవు.. కానీ నిజమైన స్నేహాన్ని కాదు అనే భావనను ఈ ఇద్దరి కథ మరోసారి గుర్తుచేస్తోంది.