పొదిగిన మౌనం

ఆ కాస్త ఆనందం కూడా వద్దా నాకు?

రాత్రులన్నీ -తీవ్ర వేదనల్లోకి

నెట్టేయబడతాను

ఉదయాల కల్లా -

ఒక కొత్త ఉత్సాహంతో

మళ్లీ మేల్కొంటాను

బాధలోనూ తీపి ఉంటుందనీ

ఆ తీపే అలవాటైతే -

విరహ వేదనలు కూడా

ప్రేమ కావ్యాల్లా అలరారుతాయనీ

అనుభవాల్లోకి వచ్చాక గానీ తెలియదు

అది, లోలోన మంటై పుట్టి

ఇప్పుడు చిగురు తొడిగిన

మోదుగు పూల వనమై విరబూస్తోంది

కాలంతో సహా -సంబంధం లేనట్టే

- బాలాజీ పోతుల